DJ Вани

На нашата сцена владеат дегенерици кои со државни пари прават кариера

Во осумдесеттите години започна да работи како диџеј по цела Македонија. Во деведесеттите, со своја музика беше доста застапен во медиумскиот простор. Пред нецели десеттина години му се насмеа среќата преку продажба на две свои композиции на еден британски продуцент, и тоа дебело наплатени, па доби ретка шанса да ја продолжи својата музичка приказна во Велика Британија.

Диџеј Вани (Манев) моментално подготвува инструментален албум во Македонија, со кој повторно ќе замине на Островот, каде го чекаат низа договори и можност за чекор напред. Диџеј Вани има ниско мислење за актуелната состојба на македонската музичка сцена, со ислучок на музиката на Кирил Џајковски, која ја потенцира во повеќе пригоди.

Поминаа доста години откако DJ Вани е пасивен на домашната сцена. Но, затоа, во меѓувреме ти се случи онаа блескава шанса за која копнее секој музичар, да заминеш во срцето на светските музички случувања. Те послужи среќа голема или многу вложен труд?

Дали ќе имаме време и место целосно да се искажам по однос на сево ова? Ќе пробам да одговорам во кратки црти. Среќата и работата подеднакво ме послужија. Најпрвин ми се случија два пресврти - продадов две песни за англискиот пазар, и запознав човек кој ме повлече таму. Тоа ми донесе можност да работам како диџеј на тамошната сцена, и од тој момент почнаа и многубројните запознавања и контакти  со многу диџеи од Велика Британија и пошироко.

Како диџеј ти се појави и упорно твореше во едно време кога таа професијата кај нас не беше премногу славна како сега. Можеш ли да направиш една паралела како денес функционираат диџеите таму, а ако овде?

Таму се е добро средено и се е беспрекорно, бидејќи така функционира музичката инустрија. Се плаќа членарина, се добиваат две бесплатни цедеа со нови синглови и те ангажира агенција. Но, мора да имаш своја опрема и диплома за тоа, ако сакаш да бидеш регистриран. За разлика од таму тука нештата се целосно испревртени, овие неколку години секој може да пушта музика и да се нарекува диџеј, да симнува музика од Нет без да плати денар за тоа, а очекува да профитира или да заработува.

Со еден збор страшно. Јас сум згрозен како функционира професијата диџеј во Македонија. Потенцирам - не може да бидеш диџеј, без да платиш ниту денар за авторски права и без да имаш диплома. Тоа не може ама ни под разно!



Дали како диџеј на своите сетови ти е дозволено е да пушташ се што ќе посакаш? Има ли некаков ред во музиката кај нив? Од што се составени твоите сетови? Настапуваш како Диџеј Вани или таму имаш некој друг псевдоним?

Јас настапувам како диџеј Вани и не се срамам од тоа што досега сум го сработил. Сетовите ми се поделени во неколку групи за разни слушатели, бидејќи пуштам музика на разни места. Слушателите се од 20 до 80 година и правам репертоар за да им угодам на гостите. Таму гостинот е над се, не е главен диџејот или егото или името на диџејот. Пуштам нивна музика, имам сетови со популарна музика, рок ретро и балкан мјузик сет.

Колку се обидуваш нешто од домашната музика или од балканската да им го сервираш на англичаните, па тие да слушнат нешто Made in Macedonia. Поточно, дали се воопшто запознаени и како реагираат на балканскиот мелос?

(се смее!!!) Па тие и не ни знаат, а не ни сакат да знаат каде е Македонија. Кога ќе им сервираш нешто ново секогаш гледаат со резерва на тие композиции, иако најчесто пуштам некои од нашите имиња, или од моите композиции кои одговараат за тамошниот маркет. Кирил Џајковски, на пример...

Какви се заработките како диџеј,  станува збор за баснословни суми?

Пази Вале... За тамошните диџеи сумите се поголеми, во секој случај повеќе си го ценат своето, а за познатите ѕвезди се движат астрономски, дури до 2.000, па и повеќе фунти, се рабира. За сите кои се дојденци во таа земја цената е од 70 до 150 фунти од вечер.

Планираш да издадеш инструментален албум, со музика наменета за странски пазар. Најави и соработа со Алекандар Масевски. Кажи ни малку повеќе за тоа...

Се работи на мојот долгогодишен проект и мое видување на музиката што ја конзумирам и ја презентирам. Сонговите се правени во најразлични периоди ов мојот живот, од моментите на подеми и падови и се разбира од среќните моменти. Сакам албумот да го работам со некој кој ќе посвети внимание на мојата работа, па затоа го избрав Масе .Тој некако ми е најсоодветен, ги знае моите потреби и има разбирање и осет за нешто што се вели светски маркет, бидејќи и тој подолго време живеел надвор од Македонија.



Неодамна во еден англиски медиум беше истакната и твојата хуманитарна активност. За што станува збор?

Тоа е списанието НМЕ во кое што се осврнуваат на сите искрени хуманитарни актвности низ светот. Според однапред избрани снимки од настапи и концерти од Македонија, како најхуманитарни во моментов ме избрале мене и Владо Јаневски, за искрените гестови и добрата волја за помош на сите оние на кои им е потребна.

Роден си во Радовиш, израснат во Неготино, со релација на живеење Македонија - Велика Британија. Ти си човек со европски вкус и круг на движење. Знаеш еден куп познати европски музичари, менаџери, уметници. Повеќе си ценет тука или таму?

Искрено да ти кажам, бидејќи таму ги ценат мојата упорност, квалитет и знање пред се, главно ме почитуваат некои од младите кои допрва ќе бида познати имиња таму (Александра Барки, ЈЛС, Луис Вал, кој е еден од најдобрите менаџери во Велика Британија). Ме почитуваат и сакаат да се дружат со мене. На многумина ова не им се верува, но тоа е, ние сме Балкан.

Таму можеби тешко се успева, но ако имаш талент, ако знаеш да го работиш добро тоа што го работиш, и ако си професионалец, тогаш успехот е неизбежен. Иако Велика Британија е позната како земја на ладни луѓе, тие можеби наизглед се ладни, но се искрени и препознаваат таленти и ги подржуваат безгранично. Не е како овде, самоуништувачки народ и нација.

Сами се уништуваме и се понижуваме. Класичен пример ни беа случувањата околу нашиот ангел Тоше, малкумина знаеја што тој вистински работеше и како функционриаше, многумина го оспоруваа и му правеа сопки, и сега тие го сакаат и се негови пријатели (???). Страшно се згрозувам од луѓе кои се превртливи и се мивки. Затоа, лично многу избирам со кого се дружам и со кого соработувам од музичарите на нашата сцена.

Ако сакаш да бидеш реален до крај, кажи едно свое видување за актуелната мак-музичка сцена, каде се се инстант хитови, а факт е дека речиси ништо не останува како трајни вредости.

Вака, ако сакаме да се тркаме со светските текови на музиката, ние сме назад едно сто години, но нештата може да се променат, само ако се сака. Треба да имаме медиум и волја за промена (пример е романската сцена, која нагло вивна напред). На нашата сцена само се дегенерици, кои со државни пари прават кариера и профитираат дебело, а ја трујат нацијата. Ни музика, ни изведба на ниво, и најчесто и со срамни текстови, а сето тоа се пропагира како хит.

Но, и крадат туѓи композиции и ги препрваат. Жив страм, катастрофа до катастрофа, тоа е нашата музика и нашата музичка сцена. За ова што се случува во Македонија, виновни се медиумите кои презентираат се и сешто, по принципот ако имаш пари да платиш (добар спонзор зад себе), тогаш цел термин ќе биде твој, независно дали е квалитет или само квантитет.

Оттука се покажува како функционира системот овде. Не велам дека парите не се двигател и надвор, но тие се во функција - кога сакаш да промовираш албум, сингл... Нештата се поставени како што треба - по квалитет. Квалитетот за се одлучува. Комплетно...

Валентина Ѓоргиевска Парго