2. март 2009.

Баклава со врвен етно концерт

Во нежна, интимна и опуштена атмосфера во полната Универзална сала, младата скопска етно група Балкава на први март, на верскиот празник Прочка го одржа својот прв самостоен концерт на овој концертен простор.

Извонредниот женски вокал, Елена Христова, за која со право може да се каже дека е најдобрата етноизведувачка кај нас, заедно со членовите на бендот Дејан Сибиновски, Никола Николов и Владимир Мартиновски, засилени со уште тројца музичари на народни инструменти, ги промовираа песните од својот нов албум Калемар.

Но неизостанаа ни старите традиционални кои се наоѓаат на нивниот прв албум Баклава, како и добропознатата егејска песна Мори чупи Костурчанки, испеана уште на почетокот. За крај на бис, пред одушевената публика, ја изведоа Ој девојче девојче ти тетовско јаболче.

Концертот на Баклава дефинитивно е потврда дека оваа група се етаблира на врвот на најдобри македонски етно изведувачи, Елена како извонреден вокал кој допира до срцата на публиката, а  нивниот материјал како музика направена со многу силна инспирација, музичка етно-рафинираност и вкус.

Нивниот албум Калемар кој се продаваше во Холот на Универзална по промотивна цена од 300 денари, буквално беше разграбан од публиката.

Со оваа свирка овој состав ја почнува серијата концерти низ Македонија.

Екипата на МММ