Next Time, 25. XII ’09.

Next Time енергични од почеток до крај

Со првиот солистички концерт одржан во петокот во полната Универзална сала, близнаците од Next Time покажаа дека имаат капацитет и квалитет да направат одлична забава за своите фанови – пишува Дневник. Првите звуци на нивниот нов хит Декември веднаш го отслика односот меѓу публиката и бендот и најавија какво ќе биде расположението до крајот на двочасовниот концерт. Секоја нивна песна беше проследена со кренати раце, танцување и хорско пеење. Се создаде амбиент што се опишува со еден збор - еуфорија.

Станете, пејте и танцувајте со нас. Ова е прекрасна вечер. Среќни сме зашто ни се оствари сонот - им рече на присутните Стефан, вокалот на бендот.

Рок-двоецот Мартин и Стефан успеаја да го остварат својот сон само по две години активност на сцената. На концертот ги отпеаја темите од својот деби-албум, но публиката ја изненадија и со изведбата на светските хитови Why did you go, Always, Here i go again и Карузо, во кои до израз дојдоа вокалните можности на Стефан. Фановите, облечени во бели маички на кои пишуваше Те сакаме Некст тајм, наизуст од почеток до крај ги пееја сите песни. Најупорните од нив успеаја да се искачат на сцената да ги бакнат, а некои и да запеат со нив.

Ви благодарам, вие сте ни најважни и не можеме без вас - велеше Стефан, обидувајќи се да им одговори на нивните емоции.

Двомесечните подготовки резултираа и со голема уиграност меѓу близнаците и бендот на сцената составен од искусни музичари. Аплаузи предизвика и настапот на Ламбе Алабаковски, кој беше единствен гостин на концертот. Поддршка од публиката младите близнаци добија од своите колеги Канго, Тони Зен, Калиопи и Наум Петрески.

Евровизиската тема Нешто што ќе остане го означи крајот на концертот. Но, расположената публика ги врати на бис. Next Time се раздели од своите верни фанови со надеж дека еден ден ќе ја наполнат Арената Филип Втори.

Дневник